Showing posts with label കവിത. Show all posts
Showing posts with label കവിത. Show all posts

22.11.08

കറവ

കുറിപ്പടിയിലെ
ലേഹ്യം
ആട്ടിന്‍ പാലില്‍
സേവിക്കണമെന്ന്
വൈദ്യര്‍
വീടായ വീട്ടിലും
നാടായ നാട്ടിലും
കറവയുള്ളൊരാടുമില്ല
നേരമുണ്ടോ
കാലമുണ്ടൊ ?
വിരുന്നുകാര്‍ക്കെല്ലാം
പാലൊഴിച്ച ചായവേണം
കയ്യുണ്ടൊ
കണക്കുണ്ടൊ?
പുര മേയലിന്
പെണ്ണുകാണലിന്
കുറ്റിയടിക്ക്
പാലുകാച്ചലിന്
കുത്തിപ്പിഴിഞ്ഞ്
കറന്നെടുത്ത്
കരയുന്ന
കിടാങ്ങളെ
കുടിക്കാന്‍ വിടാതെ
അളവുപാത്രം
തുളുമ്പിപകര്‍ന്നതെത്ര?
എന്നിട്ടും
ഓമനിച്ചു പോറ്റിയ
കോലാടിനകിടില്‍
മരുന്നിനൊരു തുള്ളി
കരുതിവെയ്ക്കാന്‍
മറന്നുപോയല്ലൊ
ന്റെ റബ്ബേ.....

13.7.08

തുരുമ്പ്

ആദ്യം കണ്ടത്
വല്ല്യുമ്മയുടെ
ചെമ്പില്‍തീര്‍ത്ത
വെറ്റിലച്ചെല്ലത്തിലാണ്
ചെമ്പു ലോഹവും തുരുമ്പെടുക്കുമോ...?
മരിച്ചുപോയ ഉപ്പാപ്പയുടെ
വെള്ളികെട്ടിയ ഊന്നുവടിയില്‍
ഉപ്പിലിട്ടുവെക്കുന്ന ചീന ഭരണിയില്‍
എന്തിനേറെ സ്റ്റൈന്‍ലെസ്സ് സ്റ്റീല്‍
ചായക്കോപ്പയിലും
പതുക്കെ പതുക്കെ വീടാകെ പടരുന്നുണ്ട്
ഈ നശിച്ച തുരുമ്പ്..
എത്രകൊട്ടിയടച്ചാലും
കടലിലേക്ക് തുറക്കുന്ന
ജനല്‍പഴുതിലൂടെ
പടിഞ്ഞാറന്‍ ഉപ്പുകാറ്റ്
എങ്ങിനെയെങ്കിലും
നുഴഞ്ഞുകയറും..

7.6.08

പെന്‍ഡുലം

നിന്നെയോര്‍ത്ത്
കണ്ണൊന്നടച്ചപ്പോള്‍
ഏകാന്ത ദ്വീപില്‍ വിരുന്നെത്തിയ
ശലഭം
പാതികുടിച്ച ചായക്കോപ്പയില്‍
‍ജീവനൊടുക്കി
പൊതിഞ്ഞുവെച്ച മധുരത്തില്‍ മുങ്ങി
ഉറുമ്പുകളുടെ വിലാപ യാത്ര
ചിന്നിച്ചിതറി
നീ ചിരിച്ച ചിത്രം നോക്കി
ശീര്‍ഷകം കാത്തുകിടന്ന
കവിത
മിനുമിനുത്ത ഉരുളന്‍ കല്ലിന്‍
‍ഭാരത്തില്‍ നിന്ന്
സ്വതന്ത്രത്തിലേക്ക്
കുതറി.
നീ പോയ വഴിദൂരങ്ങളില്‍
ജലാര്‍ദ്ര നയനങ്ങള്‍
‍അലഞ്ഞു വറ്റി
ഋ‍തുക്കള്‍ മാത്രം നിലയ്ക്കാത്ത
പെന്‍ഡുലമായി
സമയമോതികൊണ്ടേയിരുന്നു...

1.6.08

കന്യക

നോവിന്‍ പുതപ്പില്‍
തീ പടര്‍ന്ന്
പിടഞ്ഞുണര്‍ന്ന
കന്യകയായ
കവിതയിന്നും
ഓര്‍മ്മകള്‍ പൂക്കും
വഴികളില്‍
മിഴികള്‍ വിരിച്ച്
നിന്റെ
കാല്‍പ്പെരുമാറ്റം
കാതോര്‍ത്തിരിക്കുന്നു.

7.5.08

കാണാക്കിനാവ്

ആകാശത്തിനരികില്‍
സൂര്യന്‍
പുകപിടിച്ച
മുഖപടം മാറ്റി
തണുത്തുറഞ്ഞ മേഘം
കണ്ണീരുതിര്‍ത്തു.
നിലാവില്‍ ഒലീവു
മരങ്ങള്‍ തളിര്‍ത്തു.
ഭീതിമാഞ്ഞ കണ്ണുകള്‍
നക്ഷ്ത്രങ്ങളെ കണ്ടു.
പടക്കോപ്പുകള്‍ തുരുമ്പെടുത്തു
തഴമ്പില്ലാവിരലിനാല്‍
പടയാളികള്‍ പൈതങ്ങളുടെ
കവിള്‍ത്തടം തൊട്ടു.
ഇണകള്‍ വഴിക്കണ്ണു
താഴ്ത്തി
മുയല്‍ക്കുഞ്ഞുങ്ങളെ
തലോടി
അന്ന്
ചുവന്ന പരവതാനി
ചോര നിറഞ്ഞ നദിയായ്
അവനെ
മുക്കിക്കൊന്നു.

22.4.08

ശാന്തസമുദ്രം

ആഴിക്കടിയില്‍
മുത്തുതിരഞ്ഞവര്‍
പവിഴപ്പുറ്റില്‍
കൊളുത്തിക്കീറി
കണ്ണികളറ്റ വലയും
ചില്ലുടഞ്ഞ തുരുമ്പെടുത്ത
റാന്തല്‍ വിളക്കും
കണ്ടെടുത്തു.
പൊടിമീനുകള്‍
കളിപ്പന്താക്കിയത്
കൊമ്പന്‍ സ്രാവുകള്‍
ദഹിക്കാതെ തുപ്പിയ
തുഴവള്ളക്കാരന്റെ
ഹൃദയമായിരുന്നു
കാറ്റും, കോളും
ഒട്ടുമുണ്ടായിരുന്നില്ല
ഉന്മാദികള്‍
മട്ടുപ്പാവിലേറി
പറുദീസയിടെ തീരം തേടി
മലയോളം തിരകളുയര്‍ത്തി
ഉല്ലാസ നൗകയന്ന്
കടന്നുപോയിരുന്നു
കടല്‍
ശാന്തമായിരുന്നു.

16.4.08

വൈദ്യം

അമിത വണ്ണത്തിന്
വൃതം
രക്തസമ്മര്‍ദ്ദത്തിന്
യോഗ
വൈദ്യകല്‍പനകള്‍
തുടര്‍ന്നു
വിലക്കുകളുടെ വേവലാതിയില്‍
അയാള്‍
ഹൃദയം പൊട്ടി മരിച്ചു.

31.3.08

പിറവി

കണ്ണീരിന്റെ ഉപ്പു രുചിച്ച
പ്രാര്‍ഥനകള്‍
ആരവങ്ങളില്‍ വിഷയ ദാരിദ്രം
ക്ഷണിക്കാതെയെത്തുന്ന
വന്ധ്യതാ ചര്‍ച്ച
രേതസ്സിലെ ചലിയ്ക്കാത്ത ബീജം
പരിഹാര നിര്‍ദ്ദേശങ്ങള്‍
ചോദ്യശരങ്ങള്‍
പൗരുഷത്തിന്റെ വിചാരണ
കരിങ്കല്‍ തടവറയില്‍
മൗനത്തിന്‍ താഴിട്ടടച്ച
നിലവിളി
തപിക്കുന്ന തലയിണയോട്
പിണങ്ങിയ നിദ്ര
മനം പിരട്ടലിന്റെ പുളിച്ചു തികട്ടലില്‍
പരിഹസിക്കപ്പെട്ട സ്ത്രീത്വം
ചങ്കിലേക്കെറിഞ്ഞ വാക്കുകളുടെ
പഴുപ്പിച്ച കുന്തമുനകള്‍
നാഭിയില്‍ ജീവന്റെ തുടിപ്പിനു മുമ്പേ
ചുരത്താന്‍ വെമ്പുന്ന മാറിടം
ഒടുവില്‍
നിന്റെ പിറവി
മാതാവിന്റെ മാറില്‍
മോണ കൊണ്ടുരുമ്മന്ന നിന്റെ
കുസൃതി പകരുന്ന
നോവിന്റെ നിര്‍വൃതി.

22.3.08

ദൂരം..

നമുക്കിടയില്‍
മണിക്കൂറുകളുടെ
ആകാശദൂരം
ഭൂഖണ്ഡങ്ങള്‍ക്കിടയിലെ
സാഗര നാഴികകള്‍
വാചാലതയില്‍ കലുഷിതമായ
നദി
വെളിപ്പെടുത്തലുകളില്‍
നിഗൂഢമായ തിരശ്ശീല
മരുഭൂവിനും,പച്ചപ്പിനുമിടയിലെ
തരിശുപര്‍വ്വതം
വേനലിനും,
വര്‍ഷത്തിനും,
വസന്തത്തിനും
ശിശിരത്തിനുമിടയിലെ
കാലാന്തരം
പകല്‍ക്കിനാവിലെ
അവ്യക്തമുഖങ്ങള്‍
ആശംസകളില്‍ പ്ലാസ്റ്റിക് പൂക്കളുടെ
സൗരഭ്യം
എന്നിട്ടും..!
ജീവനറ്റ എഴുത്തുപെട്ടിയില്‍
ആകാംക്ഷയുടെ കണ്ണുകളാല്‍
നമ്മെളെന്താണ്
തിരയുന്നത്...?

18.3.08

കാലം

നിലാവു വറ്റിയ
രാവില്‍
മാനം നോക്കി മലര്‍ന്നു
കിടക്കുമ്പോള്‍
ഒരു കുഞ്ഞുനക്ഷത്രം
എന്നെ നോക്കി
കണ്ണിറുക്കിച്ചിരിച്ചു.
മേഘപാളിയില്‍
ഒളിച്ചു കളിച്ച്
അതെന്നെ
കൊതിപ്പിച്ചുകൊണ്ടേയിരുന്നു..
പെട്ടെന്ന് !
നേരം വെളുത്തു...

10.3.08

ശിലാലിഖിതം

തിരകള്‍ക്ക് മായ്ച്ചുകളയാന്‍
തീരത്തെ മണല്‍പ്പരപ്പിലല്ല
സഖീ.....
അവ അലയടിച്ചാര്‍ക്കുന്ന
ശിലകളിലായിരുന്നുവല്ലൊ
നിന്റെ പേര് ഞാന്‍
കോറിയിട്ടത്...