7.5.08

കാണാക്കിനാവ്

ആകാശത്തിനരികില്‍
സൂര്യന്‍
പുകപിടിച്ച
മുഖപടം മാറ്റി
തണുത്തുറഞ്ഞ മേഘം
കണ്ണീരുതിര്‍ത്തു.
നിലാവില്‍ ഒലീവു
മരങ്ങള്‍ തളിര്‍ത്തു.
ഭീതിമാഞ്ഞ കണ്ണുകള്‍
നക്ഷ്ത്രങ്ങളെ കണ്ടു.
പടക്കോപ്പുകള്‍ തുരുമ്പെടുത്തു
തഴമ്പില്ലാവിരലിനാല്‍
പടയാളികള്‍ പൈതങ്ങളുടെ
കവിള്‍ത്തടം തൊട്ടു.
ഇണകള്‍ വഴിക്കണ്ണു
താഴ്ത്തി
മുയല്‍ക്കുഞ്ഞുങ്ങളെ
തലോടി
അന്ന്
ചുവന്ന പരവതാനി
ചോര നിറഞ്ഞ നദിയായ്
അവനെ
മുക്കിക്കൊന്നു.

22.4.08

ശാന്തസമുദ്രം

ആഴിക്കടിയില്‍
മുത്തുതിരഞ്ഞവര്‍
പവിഴപ്പുറ്റില്‍
കൊളുത്തിക്കീറി
കണ്ണികളറ്റ വലയും
ചില്ലുടഞ്ഞ തുരുമ്പെടുത്ത
റാന്തല്‍ വിളക്കും
കണ്ടെടുത്തു.
പൊടിമീനുകള്‍
കളിപ്പന്താക്കിയത്
കൊമ്പന്‍ സ്രാവുകള്‍
ദഹിക്കാതെ തുപ്പിയ
തുഴവള്ളക്കാരന്റെ
ഹൃദയമായിരുന്നു
കാറ്റും, കോളും
ഒട്ടുമുണ്ടായിരുന്നില്ല
ഉന്മാദികള്‍
മട്ടുപ്പാവിലേറി
പറുദീസയിടെ തീരം തേടി
മലയോളം തിരകളുയര്‍ത്തി
ഉല്ലാസ നൗകയന്ന്
കടന്നുപോയിരുന്നു
കടല്‍
ശാന്തമായിരുന്നു.

16.4.08

വൈദ്യം

അമിത വണ്ണത്തിന്
വൃതം
രക്തസമ്മര്‍ദ്ദത്തിന്
യോഗ
വൈദ്യകല്‍പനകള്‍
തുടര്‍ന്നു
വിലക്കുകളുടെ വേവലാതിയില്‍
അയാള്‍
ഹൃദയം പൊട്ടി മരിച്ചു.

7.4.08

തണല്‍മരം

പേമാരിയില്‍
വേരുപറിഞ്ഞ്
മലര്‍ന്നു വീഴുവോളം
വഴിയമ്പലം തേടിത്തളര്‍ന്നവര്‍
മുഷിഞ്ഞ തലപ്പാവ് നിവര്‍ത്തി
കാല്‍ക്കല്‍ തലചായ്ക്കും
പ്രണയച്ചൂടില്‍ കിന്നരിയ്ക്കാന്‍
കിളികള്‍
തണല്‍ തേടിയെത്തും
ഒളികണ്ണാല്‍ നോക്കി
വിഷാദികള്‍ നെടുവീര്‍പ്പിടും
ഇണയെപ്പിരിഞ്ഞ ദേശാടനക്കിളി
തലതല്ലിക്കരയും
മക്കളെതേടി അലഞ്ഞുതളര്‍ന്ന്
ഭ്രാന്തിത്തള്ള
സങ്കടമോതും
മഴ മാറി
വെയിലെത്തും
കുരുടനല്ലാത്ത
യാത്രികനെ
കാത്തുകിടന്ന്
ഇലകള്‍ കൊഴിയും
ചില്ലകള്‍ മണ്ണോടു ചേരും...

31.3.08

പിറവി

കണ്ണീരിന്റെ ഉപ്പു രുചിച്ച
പ്രാര്‍ഥനകള്‍
ആരവങ്ങളില്‍ വിഷയ ദാരിദ്രം
ക്ഷണിക്കാതെയെത്തുന്ന
വന്ധ്യതാ ചര്‍ച്ച
രേതസ്സിലെ ചലിയ്ക്കാത്ത ബീജം
പരിഹാര നിര്‍ദ്ദേശങ്ങള്‍
ചോദ്യശരങ്ങള്‍
പൗരുഷത്തിന്റെ വിചാരണ
കരിങ്കല്‍ തടവറയില്‍
മൗനത്തിന്‍ താഴിട്ടടച്ച
നിലവിളി
തപിക്കുന്ന തലയിണയോട്
പിണങ്ങിയ നിദ്ര
മനം പിരട്ടലിന്റെ പുളിച്ചു തികട്ടലില്‍
പരിഹസിക്കപ്പെട്ട സ്ത്രീത്വം
ചങ്കിലേക്കെറിഞ്ഞ വാക്കുകളുടെ
പഴുപ്പിച്ച കുന്തമുനകള്‍
നാഭിയില്‍ ജീവന്റെ തുടിപ്പിനു മുമ്പേ
ചുരത്താന്‍ വെമ്പുന്ന മാറിടം
ഒടുവില്‍
നിന്റെ പിറവി
മാതാവിന്റെ മാറില്‍
മോണ കൊണ്ടുരുമ്മന്ന നിന്റെ
കുസൃതി പകരുന്ന
നോവിന്റെ നിര്‍വൃതി.

24.3.08

മെഹ്ഫില്‍

രാത്രി വളര്‍ന്നു
പുലരാറായി
വിരഹം പെയ്ത
മെഹ്ഫില്‍ രാവില്‍
കുന്തിരിക്കം പുകഞ്ഞു.
നേര്‍ത്തുകേട്ടിരുന്ന ഗസലും
കാറ്റിലലിഞ്ഞു
സ്വനപേടകം വലിഞ്ഞുമുറുകി
തളര്‍ന്നുറങ്ങിയ
വിഷാദി
ഹാര്‍മോണിയത്തിന്‍ ജഡത്തില്‍
ചുവന്ന പൂക്കെളെറിഞ്ഞു
പടിയിറങ്ങി.
ഹൃദയം വിറങ്ങലിച്ച്
തബല മൗനിയായി
ആരാണതിന്റെ ചിറകരിഞ്ഞത്..?
ദര്‍ബാറിനു പുറത്ത്
ആരോ നൃത്തം ചവിട്ടുന്നു
ഉന്മാദ നൃത്തം
ഒടുക്കത്തെ നൃത്തം.

22.3.08

ദൂരം..

നമുക്കിടയില്‍
മണിക്കൂറുകളുടെ
ആകാശദൂരം
ഭൂഖണ്ഡങ്ങള്‍ക്കിടയിലെ
സാഗര നാഴികകള്‍
വാചാലതയില്‍ കലുഷിതമായ
നദി
വെളിപ്പെടുത്തലുകളില്‍
നിഗൂഢമായ തിരശ്ശീല
മരുഭൂവിനും,പച്ചപ്പിനുമിടയിലെ
തരിശുപര്‍വ്വതം
വേനലിനും,
വര്‍ഷത്തിനും,
വസന്തത്തിനും
ശിശിരത്തിനുമിടയിലെ
കാലാന്തരം
പകല്‍ക്കിനാവിലെ
അവ്യക്തമുഖങ്ങള്‍
ആശംസകളില്‍ പ്ലാസ്റ്റിക് പൂക്കളുടെ
സൗരഭ്യം
എന്നിട്ടും..!
ജീവനറ്റ എഴുത്തുപെട്ടിയില്‍
ആകാംക്ഷയുടെ കണ്ണുകളാല്‍
നമ്മെളെന്താണ്
തിരയുന്നത്...?

18.3.08

കാലം

നിലാവു വറ്റിയ
രാവില്‍
മാനം നോക്കി മലര്‍ന്നു
കിടക്കുമ്പോള്‍
ഒരു കുഞ്ഞുനക്ഷത്രം
എന്നെ നോക്കി
കണ്ണിറുക്കിച്ചിരിച്ചു.
മേഘപാളിയില്‍
ഒളിച്ചു കളിച്ച്
അതെന്നെ
കൊതിപ്പിച്ചുകൊണ്ടേയിരുന്നു..
പെട്ടെന്ന് !
നേരം വെളുത്തു...

10.3.08

ശിലാലിഖിതം

തിരകള്‍ക്ക് മായ്ച്ചുകളയാന്‍
തീരത്തെ മണല്‍പ്പരപ്പിലല്ല
സഖീ.....
അവ അലയടിച്ചാര്‍ക്കുന്ന
ശിലകളിലായിരുന്നുവല്ലൊ
നിന്റെ പേര് ഞാന്‍
കോറിയിട്ടത്...